Act 24 | KYG | STEP | Faefu'a afina'mo utege'a mono hu'a ne'apataya vaya'aite'mo yagaino ne'apateya vekamo agi'amo Ananayasi'agi vayatama vayanagi mago agotimo huno ne'apateya vekamo agi'amo Tetalasi'agi hu'a Sisaliya taonifi'mo u'nae. U'a yagaino ne'apateya vekamo Filikisi aulagale'mo he ti'a mai'ne'a Polo'mo agoti hu'a ate'nae.

Acts 24

Yu vaya'mogimo Polo'mo agoti hu'a ate'naya gemae

1 Faefu'a afina'mo utege'a mono hu'a ne'apataya vaya'aite'mo yagaino ne'apateya vekamo agi'amo Ananayasi'agi vayatama vayanagi mago agotimo huno ne'apateya vekamo agi'amo Tetalasi'agi hu'a Sisaliya taonifi'mo u'nae. U'a yagaino ne'apateya vekamo Filikisi aulagale'mo he ti'a mai'ne'a Polo'mo agoti hu'a ate'nae. 2 Tetalasife'mo ge hu'nageno eno Polo'mo aepa faino agoti huno ne'ateno'ae'mo, Ala nene, huno, Kagaemo lagaete'mo alagepa huka yagaika nelatanageta alagepa huta magokepi lokaeta afa'a mai'none. 3 Lagaemo ani kavafe'mo muki afina'mo muki aupilagamo amuse huta nekateta kahao ke heta ne'maune. 4 Kahao ke hove. Fiku yanage'na yatala gemo hisugeno alaga kahaegaiyanagi aise gemo hisuva gemo afiyo. 5 Ani vekamo lagaemo ago age'nonana atalave atalava vekamo mai'niye. Agae gemo alino aepa faino apate'nige'a muki aupilagamo mai'naya Yu vaya'mogi apano aege aege hu'a ne'maiye. Agaemo Nasalasa vekamo akame nehaya vayapati ala ne'apimo mai'nige'a akame hu'nageno alino fako huno nelate. 6 Alopa mono notie'mo huno faipa huno ategefe nehigetae'mo kalavusi huta ate'none. Lagae ke'aepa geleti'mo agoti huta ategefe'mo hu'nonana 7 ati vaya'aite'mo yagaino ne'apateya vekamo Lisiyasi'a layapati'mo lokiya kava huno alino laha faleno avalelino u'niye. 8 Lisiyasi'a, agoti huta ategaune, hutapa hu'naya vaya'mo utapa Filikisi aulagale'mo agoti hutapa ateyo huno laha pai'niya'mofe'mo e'none. Loka huka afigegeno'ao agai'a avayafati'mo agoti huta ne'atona kavafe'mo ava gemo hisigeka afigane, huno ha pai'niye. 9 Ani agufa gemo hu'a Yu vaya'mogi, lama gemo nehiye, hu'a ha pai'nae.

Polo'a agai'amo gemo huno ha maeno hu'niya gemae

10 Yagaino ne'apateya gamani vekamo'a Polo'mo gemo hisiyafe'mo aulama hu'nigeno Polo'a huno'ae'mo, ago afi'novana yatala kafugamo Yu vaya'mogitale'mo yagaika nelatana'mofe'mo naipamo'mo falu hu'niyanage'na gemo hu'na naha mae'na kaha paigesuve. 11 Kagaemo ani vaya'aife'mo loka huka apafi gesanage'apae'mo ani gemo kaha paisageka afigane. Nagaemo Gotife'mo mono hisuvafe'mo Yulusalemu taonifi'mo u'na mai'nogeno tuolofu'a afina'mo utege'na hemenimo mai'nove. 12 Yu vaya'e'mo alopa mono nopi'mo ge kavata osuge Yu vaya'ai mono no'apifi no'apifi'mofi taoni'apifi'mofi hu'na hosu kava'mo hisayafe'mo ali'na he ti'na o'apatege hu'noge'a o'nage'nae. 13 Hemenimo agoti hu'a ne'nataya gee'mo alagi lama gemo nehune, hu'a ali'a kave oligae. 14 Ani gemo nehuva'monanafa mago'e gemo ae'na hakalo hu'na kaha paiguve. Nagaemo mago aigofe kane hu'a nehaya kate'mo akame nehu'na laginago vaya'ai Goti'apimofe'mo mono nehuve. Muki avo'mo kae male'naya gemo Mosese ke'aepa ge'e Gotitegati gemo alini e'a ae'a hakalo hu'a hapa nepaiya vaya'ai ge'apienagi hu'na nagesa afi'na fatago nehuve. 15 Apakaemo muki hosu vaya'e alagepa vaya'e'mo fali'nayateti'mo he tigae, hu'a apakesa afi'a fatago hute'a apavayagunagu hu'a agava mai'naya kava hu'na nagesa afi'na fatago hute'na navayagunagu hu'na agava ne'mauve. 16 Nagaemo Goti aulagale'e ma mopafi vaya'ai apaulagale'e'mo yu'ilaga veka'nimo'a agoti huno o'natesiyafe'mo nayamukiki hu'na alagepa kava'mo nehuve.

17 Akeya'vilaga Yulusalemu taonifi'mo atale'nu'na lusi kafugamo maite'na henaga'amo mago ofalini monimo alite'na vaya'nimo hapa maesiya ofalini monimo apamisuvafe'mo alini'na ai'na atagi ne'na Yulusalemu taonifi'mo e'nove. 18 Alopa mono nopi'mo hai'na mono kava'mo hu'na nagufamo ali'na alagepa hu'na atete'na mono kava'mo hu'noge'a nage'nae. Ani afina'mo nagae'e'mo asole vaya'mo magokepi lokae'a o'maige apano o'aege hu'nageta afa'a mai'none. Mono nopi'mo mai'noge'apae'mo mago Yu vaya'mo Esiya kotegati e'naya vaya'mogimo nage'nae. 19 Ani vaya'mogi agoti huta ategaune, hu'a hisayana e'a kagae kaulagale'mo afa'a agoti hu'a nategae. 20 E'a agoti hu'a o'natesage'apae'mo manile mai'naya vaya'mogimo kanisole vaya'ai apaulagale'mo he ti'na mai'nova afina'mo hosu kava'nimo age'nisaya kavafe'mo afa'a kaha paigae. 21 Hosu kava'mo osu'nova'mofe'mo na agufa kavatefe'mo agoti hu'a ne'natafi, hu'na o'afi'nove. Apaulagale'mo he ti'na mai'ne'nae'mo alopa gefati'mo, fali'naya vaya'mo he tigae hu'na nagesa afi'na fatago hu'nova kavatefe'mo hemenimo agoti hutapa ne'natae, hu'na hapa pai'nova'mofe'mo lapaulagale'mo agotimo hu'a ne'natafiye, huno hapa pai'niye. 22 Filikisi'a Polo'mo akame nehiya kafe'mo ava gemo ago afi'niya'mofe'mo Polo ge'amo afiteno agoti huno hano huno ate'niye. Filikisi'a Yu vaya'aife'mo, ati vaya'aite'mo yagaino ne'apateya vekamo Lisiyasi'a esige'nae'mo ali'na alagepa hu'na agoti hu'na ategauve, huno hapa pai'niye. 23 Ani gemo huteno Polote'mo yagaino ne'ateya ati vekae'mo, avalelikuka kalavusi huka o'ateka kalavusi nopi'mo afa'a ate'nege'apao ao vaya'mogimo ha mae'a yagai'a ateyo, huno ha pai'niye.

Polo'a Filikisi'e a'a'e'mo hana pai'niya gemae

24 Mago afina'mo utege'ana Filikisi'e a'amo Yu vayapati a kanomo agi'amo Nulusila'e'mo e'na'ae. Filikisi'a Polofe'mo ge hu'nigeno eno Yesu Kalaisife'mo agesa afino fatago hisiya agufa gemo ha pai'niye. 25 Polo'a alagepa kavafe'mo ava gemo huno ha paige vaya'mogimo apakai'api apakufale'mo apamete apamete hu'a yagaisaya kavafe'mo ava gemo huno ha paige Goti'a agoti huno apatesiya kavafe'mo ava gemo huno ha paige nehigeno'ae'mo Filikisi'a koli huteno, Afa'a ateka uvo. Henaga'amo mai'ne'na gekamo afiguve, hu'na hisuva afina'mo ge hisugeka eka naha paigane, huno ha pai'niye. 26 Filikisi'a Polo'mo kalavusifati'mo hatu mae'na atesuvana mago monimo namigiye, huno agesa afiteno mago'e huno ge hu'nigeno e'nige'ana ge huge afige hu'ana mai'na'ae. 27 Filikisi'a Yu vaya'mogimo amuse hu'a atesayafe'mo Polo'a hatu maeno o'ateno kalavusifi'mo afa'a ate'nigeno mai'niye. Lole kafugamo utegeno Posiyasi Fesitasi'mo Filikisi aimu'yale'mo eno mai'neno yagaino apate'niye.